النظر تحت جبل الجليد- متخليش كل حركة تثبتك- اذا لم تقرأها فتأكد ان السيسي قد منعك

الى اصدقائي اللي بيطالبونا بالموضوعية تحت شعار "هو انتم ليه بتنتقدوا السيسي حتى لو عمل حاجة كويسة في مصلحة مصر؟" ..
علشان تريح نفسك من الإستغراق في التفاصيل اللي ممكن تتعبك ..  خليني افكرك وبافكر نفسي معاكِ ان في حاجة اسمها الإستراتيجية وفي حاجة اسمها التكتيك .. والإستراتيجية طبعا هو الهدف النهائي اللي بنسعى بطرق مختلفة وخطوات محددة للوصول اليه. والطرق والخطوات دي  هي اللي بنقول عليها تكتيكات . اول حاجة بيعملها اي متابع انه بيحاول يقرأ الإستراتيجية اي ايه الهدف النهائي وهي في الغالب بتبان بتحليل عدد من التكتيكات ورصد اتجاهاتها (معرفة هي رايحة في انه سكة؟؟ الندامة ولا السلامة).. طيب لو الإستراتيجية عكس اللي احنا عايزينه؟ يعني مثلا لو واحد استراتيجيته النهائية انه يطلع بينا على اسوان في حين ان احنا عايزن نروح الساحل في الحر والفرهدة دي؟؟ نعمل ايه وقتها؟؟  طبعا الطبيعي هنفضل نرفض استراتيجيته دي حتى لو عمل تكتيكات جميلة ولطيفة زي انه يوقف بينا مثلا في استراحة حلوة او انه يحجز لنا في موفنبيك او انه كان بيسوق بشياكة مثلا... لأن في النهاية روعة التكيكات وشياكتها مش هتغير حاجة في انها هتودينا لهدف احنا مش عايزينه... هو ده بالظبط اللي بيعمله السيسي.. السيسي بيعسكر البلد بيصادر الحريات بيقلل مساحة المجال العام بيعمل سياسات نقدية انكماشية وسياسات اقتصادية تقشفية بيدي امتيازات هائلة لمؤسسة واحدة من مؤسسات البلد كل ده بهدف استراتيجي عكس هدفنا تماما هو هدفه استعادة حكم اتوقراطي يرفض الديمقراطية وينظر الى الموارد والسلطة على انهم مغنم شخصي او عائلي او حكر على مؤسسة او قطاع من المصريين دون غيرهم.. وفي سبيل ذلك يتم تصنيف المصريين الى اعضاء في مؤسسات اقوى من القانون  او لهم صلة بهذه المؤسسات ومصريين لا حق لهم ويمكن استباحتهم بكل الطرق المتاحة ..وينظر الى الموارد على انها كشف مرتبات و بدل ولائات تمنح اولا لأعضاء الطبقة الحاكمة المرتبطة بشبكة المصالح وما تبقى منها ممكن نشوف نعمل بيه ايه لبقية ال 80 مليون..  الأزمة ان طريقه غير طريقنا خالص..دي الأزمة يا عزيزي ويا عزيزتي مش انه رفع ضرايب هنا ولا افتتح كوبري هناك.. بص شوية تحت جبل الجليد ومتخليش كل حركة تثبتك كده متبقاش خفيف.