فايزة اللي دايما عايزة

هكذا تفكير الجنرال حينما يشعر بالخطر على الأمن القومي

أمن قومي يعني المجتمع المدني خطر وبما أن المجتمع المدني خطر يبقى فايزة طبعا. نجيب فايزة  صاحبة الأيادي السوداء على المجتمع المدني واللي كانت شهادتها وشهادة ظابط امن الدولة الدليل الوحيد الذي اطمئنت له المحكمة في قضية محاكمة منظمات المجتمع المدني الشهيرة اعلاميا بالتمويل الأجنبي رغم كل ادلة النفي ورغم ان المحكمة نفسها لم تثبت اي ضرر على  الأمن من شوية كلام بيتكلم عن دعم الديمقراطية والحكم لا مؤاخذة الرشيد .. نجيبها مستشارة للأمن القومي للرئيس اللي بيكره المجتمع المدني ويراه مصدر تهديد , وفايزة تكره المجتمع المدني اكثر فلقد صنعت نجوميتها الدولجية القومنجية بهذه الكراهية .. لقاء السحاب بين الجنرال وام النجا .. رسالة واضحة طبعا المجتمع المدني خطر فعلا على الأمن القومي للأستبداد وفايزة دايما عايزة.
فايزة دايما عايزة  وتتلاقى دائما الرغبات بين فايزة اللي عايزة مزيد من المناصب ومزيد من دم المجتمع المدني  وسمعته والجنرال اللي عايز بردوا, عايز يفصل وطن على مقاسه ومجتمع مدني يكون large وبيريح في اللبس  تشرف عليه فايزة وتنشط فيه داليا ويتحدث بأسمه حافظ..
فايزة قادمة من عالم ما قبل مبارك وهو عالم يعاد تركيبه وتجوديده الآن
أموال المعونة الخاصة بتنمية الديمقراطية والمجتمع المدني كانت بتدخل جيوب الحزب الوطني وخزائنه ولما اعترض المانحين وقرروا هما اللي يوجهوا المنح ظهرت فايزة في دور اللص الشريف وبدأت توزع التهم وتقدم البلاغات وتتاخد شهادتها دليل إثبات لأدانة منظمات وإصدار أحكام بالحبس والمصادرة والمنع

كانت أهم مهام وزارة التعاون الدولي بعد الثورة هو تعقب الأموال المهربة من مبارك ورجاله غير أن فايزة تركت الأموال ولم تحرك الوزارة أي طلب إلا بعد عاما واحد حتى تعطي اللصوص فرصة. آمال فايزة كانت بتعمل ايه؟ كانت بتقوم بمهمة تانية وهي تنفيذ اول عملية انتقام قامت بها دولة ما قبل يناير 2011 وهي عملية ملاحقة وإدانة وتشويه المجتمع المدني تلك العملية التي تلاها سلسلة من عمليات الانتقام لكل من كان له دور في الثورة على نظام مبارك.

تعود فايزة الى المناصب ولا نقرأ في ذلك الا ان فايزة كبيرة في السن واحنا عايزين ندي فرصة للشباب !!!! ازاي يا جدع !!! هي دي مشكلتك يعني !!! وكأننا معندناش مانع في المشي في السكة البطالة لكننا ضد ان يفعل ذلك من فوق الستين.. وبدلا من ان نرفض التوجه البعض منا ينصح الرجل بأستخدام افكار جديدة وأجيال جديدة في  القمع, أدونا بقى فرصتنا لخدمة نظام يوليو ودولته القبيحة!!

انا مش فارق معايا حكاية سنهم دي خالص ولا تعنيني على الإطلاق هي عندها كام سنة انا اللي يعنيني أنها وجه نظام مبارك القبيح ويد المجلس العسكري في تصفية المجتمع المدني. المشكلة مش شباب وكبار المشكلة الأدوات اللي بيتم استخدامها والرؤية اللي بيتم تمريرها .. لو مش بفايزة هيبقى بغيرها ولو كانت مشكلتكم في السن فممكن جدا الجنرال يريحكم ويجيب لكم ناس لسة مخلصين اعدادية بس هيحققوا نظريته في استعادة دولة يوليو بأكثر اشكالها قبحا

 العبرة مش بالسن ولا هتتحل مشاكلنا بأستبداد شاب بدلا من استبداد طلع على المعاش..انا هقولك أن ريجان كان في سن فايزة دلوئتي . وهيلموت كول ومارجاريت تاتشر نفس الحكاية . وعلى الناحية التانية عبد الناصر كان عنده 34 سنة  لما بدأ حكاية دولة يوليو من بدايتها . العيال الصيع بتوع تمرد وطارق الخولي في سن الورد وممكن جدا يستعين بيهم في حكاية التمكين لو هي دي اللي مزعلاكم يعني لكن احنا ازمتنا في التوجه مش السن.  اعرفوا اصل المشكلة واساس الخلاف علشان ما نلاقيش نفسنا في كل مرة نرفع شعارات هما اللي بيجرونا ليها ويحسسونا ان غاية المنى انهم يحققوها لنا

 أصل المشكلة مش فايزة عندها كام سنة أصل المشكلة فايزة جاية تعمل ايه.