محدش فوق القانون يا كابتن متحت

من كام يوم لاقيت واحد بيقول انتم بتقولوا ايه يا جماعة ده مارداونا اللي هو اهم لاعب في تاريخ نابولي كلها لما عمل حاجة غلط شرطة نابولي وقضاء نابولي ادانوه وسجنوه مفيش حاجة اسمها ان تريكة خط احمر او اخضر او بمبي او فوشيا. مفيش حد فوق القانون يا كابتن متحت.. ولأن الموضوعية فرتكت الترنك في الكلام ده احب بس اقول لحضراتكم طبعا مفيش حد فوق القانون لكن الأول يبقى فيه قانون يمثل الإرادة العامة على رأي الفرنساويين و ده ما حصلش وشكله مش هيحصل قريب .. دي اجراءات استثنائية من لجنة غير قضائية بالمناسبة مشكلة من الحكومة بالمناسبة مش اجراءات قضائية زي النموذج بتاع نابولي ومارادونا تاخد الناس بالشبهة وعقابا على رأي سياسي في اغلب الأحيان وتريكة وغيره مش هو الموضوع تريكة عنوانه وأشهر واحد اتعمل معاه كده اعرف ناس بالأسم تم التحفظ على اموالهم لمجرد ان لهم رأي معلن يخالف السلطة العسكرية الإستثنائية وهم ناس عاديين تماما وناس تانية اتاخدت بالشبهة وناس بدأت تستحلى الموضة فوسعت دائرة الإشتباه وقدمت بلاغات قد يؤدي لمصادرة اموال تانية.... البلد اللي بتتباهي انها عملت مؤتمر اقتصادي مكسر الدنيا فيها اجراءات حكومية ببتحفظ وممكن تصادر ممتلكات الناس معاقبة لهم على ارائهم وتاخدهم بالشبهات دون تحقيق ودون ادانة قضائية.. يؤسفني انكم جميعا خرجتم من خانة المدافعين عن الحقوق الأساسية للناس للدفاع عن الإجراءات الإنتقامية من الدولة لمجرد انها بتطارد الناس الوحشين اللي كانوا وياللهول ممكن يأسسوا لدولة تعاقب الناس على ارائها او تأخد الناس بالشبهة او تمنع الناس انها تعبر عن انحيازاتها بحرية