ملاحظات لأصدقائي الليبراليين حول ازمة الجزر والموقف منها

1- تقع الليبرالية الكلاسيكية المبنية على المذهب الفرداني individualism في ازمة تفسير اولية حينما يطلب منها تفسير هذا الموقف  اذا كان الهدف من اي مجتمع هو فقط صيانة حقوق الفرد والدفاع عن حرياته لماذا يستدعى نفس هذا الفرد للدفاع عن الوطن؟ ا ولماذا يكون موته في سبيل هذه القضية موت بطولي؟ بما اننا بندافع بس عن حقوق الفرد عايزين ليه الفرد ده يموت وهو بيدافع عن حقوق افراد تانين؟

كانت الإجابة ان الفرد وحقوقه  وحدة بناء تعبر عن مصالح فردية  تتجمع سويا مجموعة من المصالح الفردية لتخلق فكرة المصلحة العامة ... المصلحة العامة دي اللي هي تجميع نهائي لمجموعة المصالح الفردية عندنا نحن الليبراليين الكلاسيكيين هي اللي بتشكل الفكرة المجردة لفكرة الوطن بمعناه في الفهم بتاعنا وهي في الأصل لا تتعارض مع المصلحة الفردية الا في تقاطعات قليلة جدا منها الحالة اللي احنا بنتكلم فيها دي  بتاعة استدعاء الفرد للدفاع او الموت في سبيل الوطن او القيمة وفي الحالة دي ننتصر للمصلحة العامة على المصلحة الفردية وده اللي بيعمله القانون لما بينظم ممارسة الحريات في المساحة العامة حتى لا تتعارض مع بعضها البعض وابسط مثال لذلك تنظيم حرية الناس وليس منعها في استخدام المرافق العامة مثلا.. ونفس الحالة دي هي اللي بتفسر لماذا يعتبر الدفاع عن الوطن شرف في بريطانيا الليبرالية وفي الصين الشيوعية وفي كوريا السلطوية ... 
2- وده مهم بردو في تفسير موضوع لماذا يكون الدفاع عن حقوق الأمة -كمفهوم  مادي يعني التجمع البشري الموجود على ارض ما ,ومفهوم معنوي بما لهذا التجمع من الإيمان بقيم مشتركة وامتداد تاريخي على ارض بعينها- قيمة هامة .
ان تكون ليبرالي لا يعني على الأطلاق ان تتساوى عندك كل المساحات الجغرافية بإعتبار ان كلهم ارض , فالمساحة الجغرافية التي تمنح امتك او بلدك ميزة نسبية اكثر تستحق ان تدافع عنها اكثر وتبذل لأجلها اكثر وتتمسك بها اكثر.  ليه؟  لأنها تحقق المصلحة العامة اكثر , فتحكمك (كأمة) في نقط بحرية هامة يجعلك في حالة استراتيجية افضل ويجعلك تحصل على مزايا الموقع اللي ممكن يوفر عليك مزيد من الدماء او يجلب لأفراد الأمة مزيد من المكاسب.. والا مكانتش بريطانيا بذلت الدم والنار علشان تحافظ على نقط بحرية هامة لها في العالم ... يا صديقي والله ما فيش اي علاقة بين الليبرالية وبين انك تنظر الى العالم على انه شوية تراب ما يفرقش فيه القطب الجنوبي عن اهم الممرات الحيوية اللي في العالم ... لا هي ناصرية انك تدافع عن حقوق الأمة ككل ولا ليبرالية انك تشتم في الناس علشان غيورة على مصالحهم كأمة واحدة لها امتداد في التاريخ. والا لما ظهر حاجة اسمها علم الجغرافيا السياسية 

3- احنا مش هنعمل من الفسيخ شربات ولا هنغير تركيبة الناس في يوم وليلة , انا بردو شايف ان قضية الحريات واحدة من اهم القضايا في الدنيا , لكن المصريين مرتبطة لديهم فكرة الوطنية والكبرياء القومي بفكرة الأرض والحفاظ على الأرض .. نحاول نتكلم لغة الناس علشان حتى يفهمونا واحنا بنتكلم .. الأرض عندهم قضية وطنية .. هنيجي احنا نقولهم هي لا وطنية ولا بتاع .. يبقى احنا بنهزي...
4- طبعا قيمة الأشياء بتتحدد في التمن المدفوع فيها , فالأرض اللي بيتدفع فيها دم اغلى عند الناس وده منطق الأمور , اه في حاجة اسمها رمزية وتمن مدفوع ولا يمكن ابدا ان تساوى بين الأشياء.. امر طبيعي وعقلاني بردو ان نفهم ان في عوامل غير العقلانية المباشرة تحرك المشاعر الوطنية للناس .. اي تعالي عليها يخسرك 
5- الناس بقى اللي ماشيين في السكة البطالة بتاعة القانون الدولي بيقول مش عارف ايه ,  دول ما قرأوش حرف في الجغرافيا السياسية ولا الجيوبولتيك ولا فاهمين حاجة عن طبيعة البيئة الدولية ولا عارفين حاجة عن شكل وطبيعة النزاعات البحرية والحدودية في العالم  ولا حتى قرأوا التاريخ بتركيز شوية ... السياسة يا افندية هي علم دراسة توزيع القوى والقوة هو مفهوم الأساس لها , القانون الدولي ده اتعمل علشان الناس الفاضية تلاقي لها اي حاجة يتكلموا فيها لأن البيئة الدولية تفتقر للحكم الأعلى او جهة تنفيذ القانون , والناس اللي درسوا سياسة هيعرفوا ان اخر حاجة بيهتموا بيها في كليات واقسام العلوم السياسية هي القانون الدولي ده .. النسق الدولي بيتشكل على حسب مفاهيم القوة وقدرتك على الحفاظ على مصالحك القومية والا مكانتش الحدود الدولية اتغيرت كل شوية ولا كنت سمعت عن مطالب روسية في القرم , ولا مطالب انجليزية في فوكلاند ولا مطالب دنماركية في جرينلاند ولا مطالب هولندية في سورينام ...مفيش دولة كبيرة او متوسطة او تطمح انها تبقى كبيرة يبقى في تحت ايديها ممر ملاحي دولي يمنحها ميزة استراتيجية  او عسكرية او سياحية حتى تتخلى عنه بأي شكل علشان القانون الدولي .. القانون الدولي ده ممكن تاخده السعودية تبله وتشرب ميته وتعمل على ميته شربة لسان العصفور او مرق ’, لو افتراضنا حتى انه في صالحها في تفسير السيادة على الجزر ... 
يا اصدقائي نحن في حاجة الى اعادة تعريف ليبراليتنا او فهمنا للأمور لأننا لو قلنا ان الدفاع عن المصالح الوطنية هي قومية وناصرية واحنا كليبراليين مش فارق معانا الأرض والمصلحة الوطنية يبقى اما الدول الكبيرة دي مش ليبرالية او احنا فعلا اللي من كتر ما عايزين نخالف بنخترع ليبرالية جديدة