عن ابو خلفية وبتاع الأمن القومي والجزر المصرية المتباعة

وقال يقولك جيل رابع ... يا عزيزي انها حرب الجيل الأول التي شنها كل مستبد عبر التاريخ على اهله للحفاظ على كرسي الحكم بالقوة المسلحة ولو على حساب كرامة البشر واستقلال التراب الوطني ... ارض واحدة من السلوم غربا لتيران وصنافير شرقا

لما راح إثيوبيا والسودان ووقع على الاتفاقية الغامضة بتاعة اعترافه بحق إثيوبيا في التحكم في المنبع وحقها في البناء على النهر استعجبت جدا ايه يعني الفكرة في التنازل المجاني ده؟ مقابل ايه يعني؟ طيب مش هتقدر ترد على الإجراءات الأثيوبية فهمناها لكن ايه الحكمة يعني من انك تقولهم انا مش بس مش قادر ارد ده انا كمان باقول من حقكم تقفلوا المحبس.. يا أخي طيب سيب الموضوع محل نزاع .. طيب سيبوه متعلق علشان يفضلوا خايفين من أي رد فعل ويستجيبوا لضغوط وعلى الأقل يكتفوا بسد واحد مش كل لما تعجبهم الفكرة يبنوا سد!!! 
فضلت تزيد علامات الاستفهام والتعجب لحد ما راح وفي غفلة من الزمن يعيد ترسيم حدود بحرية مع قبرص واليونان وإسرائيل بردو يقر بوضع فيه اجحاف لمصر.. رجع السؤال تاني يا عم المارشال مش عارف تحل سيب الموضوع محل نزاع زي ما فيتنام والفلبين واليابان عاملين مع الصين على الأقل ممكن ندعي ملكية في حقول الغاز الطبيعي اللي تقدر ببلايين... لكن بردو وقع على بياض...
لغاية بقى ما لاقيت الخارجية المصرية وجنرالات القوات البحرية المصريين اللي المفروض شغلتهم انهم يدافعوا عن حقوق مصر وبياخدوا فلوسهم من المصريين طالعين يقولوا يا جماعة احنا مالناش حق في السيطرة على مضيق تيران وجزره دي بتاعة السعودية اصلا.. طيب يا عم الأمن القومي؟ طيب الدم اللي راح عليهم؟ طيب انها اصلا في حيازتنا؟ طيب حتى استشيروا الناس ايه جو الحرامية ده؟ طيب بما انكم بتحبوا البيزنس دي أهم مراكز الغطس في مصر والبحر الأحمر وقطع رزق ناس؟ حاجة كده زي ما تكون مقتنع بحقك في قضية فتجيب محامي وتقوله أتصرف يروح إدام القاضي يدافع عن خصمك ويقول عليك أنت اللي مدان. طبعا بخلاف محاولات خنق السياسة في البلد وتخوين المجتمع المدني و أزمات حقوق الإنسان إلى حولت صورة مصر في الضمير العالمي لثقب اسود للقمع والانتهاك.. كل هذا يجمع أدلة إدانة بتقول نحن تجاوزنا مرحلة الفشل في الحكم إلى مرحلة أكثر انحطاط وهي تعمد الفشل والرغبة في سحب أوراق القوة من مصر لسنوات قادمة... ده بقى نسميه ايه??
في عدة اسباب متعلقة برفض التنازل عن الجزر واأي ما كان موقفك فيهم فأنت في معسكر الرفض فبلاش تقسموا المتقسم اصلا . واي ما كان سببك فأنت في النهاية لازم تنضم لحملة واسعة للرفض بدون تجزئة ان ده رفض الليبراليين وده رفض اليساريين وده رفض الإسلاميين وده رفض القوميين :
1- لو انت مهتم شوية بإعتبارات الأمن القومي الحقيقية مش تخاريف الجيل الرابع بتاع اكاديمية ناصر هتعرف ان التحكم في النقط البحرية الهامة دي زي جبل طارق اللي انجلترا مصممة تتحكم فيه لغاية دلوقتي بالإحتلال والغلاسة وهما مالهمش حق لا تاريخي و جغرافي فيه. وزي شبه جزيرة القرم بالنسبة للروس وزي البسفور بالنسبة لتركيا وزي باب المندب وقناة السويس يبقى لازم ترفض ان مصر تتخلى عن ميزة استراتيجية تحت تصرفها فعلا لدولة اخرى لها عقيدة استراتيجية مختلفة. 
2- لو انت مهتم بالديمقراطية والحق في انك تعرف كيف تصنع القرارات وحق كل مصري في معرفة ارض مصر اللي المصريين دفعوا فيها دم بتروح فين وازاي يبقى اكيد هترفض ان واحد يقوم الصبح وبجرة قلم بدون استشارة حد او فتح حوار مع حد يحب يجامل ضيف اجنبي جاي يزوره بأنه يقطع له حتة من البلد...ما هو احنا بردو مش ضيوف احنا صحاب الأرض الفعليين واصحاب المصلحة مش ارض فلان ولا علان هي علشان يتنازل عليها.
3- لو انت بقى من بتوع القوميين وان الأرض عرض وان دم المصريين اللي اتدفع في ارض لا يقايض بشوال رز ما ينفعش تغير كلامك وترجع فيه لمجرد ان اللي عمل كده واحد من الجيش اللي هو قدس اقداس الفكر القومي المصري.
4- لو انت بقى من بتوع تحيا مصر حتى لو هنموت كلنا ومفهومك عن مصر هي الأرض ومؤسسات الدولة المتشكلة حولها ,لما الأرض دي تتباع ما ينفعش تجي تقولي الكلام ده تاني ولازم تفضل متمسك بكلامك للأخر.
5- لو انت بقى من بتوع الحدود تراب والكلام ده وان كلنا واحد يا حبيبي ما هي السعودية نفسها هي اللي مش عايزة الحدود تبقى تراب هي عايزة الأرض وبعد كده تذلك انت واهلك بالفيزا .. يا راجل ده انت بتروح تحج بفيزا ممكن تتقبل او تترفض.

6- لو انت بقى مهتم بفكرة التحالفات مع السعودية وان السعودية حليف مهم .. القاعدة بتقول حليف قوي خير من تابع ضعيف وما تفعله القيادة المصرية انها بتحول مصر لتابع ضعيف لا اوراق له وبتنزع عن هذه العلاقة صفة التحالف وتحوله لتبعية مفضوحة
قدم السيسي نفسه انه حتى وان فشل في الملفات الداخلية فلديه خبرة ومعرفة بالأمن القومي ستجعله يغطي على الفشل الداخلي من خلال سياسة خارجية ماهرة وحصيفة تجعل مصر مركز مهم لتلقي التمويلات .. اهمية قضية ريجيني انها تعتبر القضية الرابعة تقريبا او الخامسة التي يمنى فيها بفشل سياسي ذريع على مستوى توقع الأزمة والوقاية من الأزمة وعلاج الأزمة وإزالة اثار الأزمة.

السيسي فشل في ادارة ملف النهر واعترف بحق اثيوبيا في التحكم في المنبع , ثم فشل في ملف ترسيم الحدود المتوسطية وكثر الكلام عن حقول الغاز المهدرة لصالح قبرص او اسرائيل , ثم فشل في ادارة ملف الطائرة الروسية , ثم فشل في ملف العلاقة مع البرلمان الأوربي , ثم فشل في ملف ادارة العلاقات مع المؤسسات المدنية الدولية ثم فشل يلوح في الأفق في قضية ترسيم حدود البحر الأحمر ثم فشل اخر متعلق بإيطاليا .. يعني الحاجة الوحيدة اللي السيسي كان بيسوق نفسه على اساس فهمه فيها وهي الأمن القومي بتفك منه تماما وبيخرج فيها من فشل الى فشل ... ده بيعمل تآكل في الصورة الأسطورية اللي اتسوقت ليه , يعني لا احد بيعول على ايطاليا ولا حد بيعول على الإتحاد الأوربي لأني زي ما قلت قبل كده عوامل تآكل النظم بتيجي من داخلها لا من ايطاليا ولا من امريكا ولا من كوستاريكا .. ببساطة يعني لا احد يعول على ان ايطاليا هتوقع نظام السيسي لكن ما نعول عليه التراكم في الفشل الصغير بيؤدي الى فشل كبير ...


اللي اتدفع فيه دم ما يتباعش بالرز يا بتاع الأمن القومي والجيل الرابع والحفاظ على استقلال الوطن وسلامة اراضيه...

يا راجل ده حتى وانت بتقول تحيا مصر كنت 

بتكدب ... كفاية رخص بقى