بالنسبة لتصويت مصر مع القرار الفرنسي ومع القرار الروسي والرد المتناول ان دول قرارت مش متعارضة اصلا.. في مثل بيقول المعاصرة حجاب (يعني انك تبقى معايش الأحداث يوم بيوم دون ان تأخذ هدنة لرؤيتها من بعيد ده بيحجب عنك الصورة الكامل) مش متفق مع المثل ده 100 في ال 100 لكن شايف ان الأصح التجزئة حجاب (بمعنى تجزئة كل موقف منفصل والغرق في تفاصيله وعدم الكشف عن الروابط الخفية او حتى العلنية بين المواقف وبعض)
اصل الأزمة في حلب ان كان في اتفاق هدنة موافقة عليه روسيا بالفعل لكنها كانت شايفاه هدنة على الأرض بس تسمح فيها لطائراتها انها تستبيح السما وتضرب اي هدف في اي وقت , روسيا لما قدمت نفس فكرة الهدنة لم تكن تعالج اصل الأزمة اللي هي استباحة طائراتها للسما واستثناء القتل الجوي من قائمة القتل المحظور... وده سبب معارضتها للمشروع الفرنسي اللي هو توجه لأصل المشكلة لأن اي حاجة دون منع الطيران الروسي من قتل الناس يبقى قرار الحبر اللي اتكتب بيه اغلى ما فيه ..
نرجع بقى لموقف مصر من الأزمة واللي بسببها كتبت الكلمتين بتوع ان التجزئة حجاب.. لو انت جيبت نتيجة التصويت كده لوحده اللي مصر صوتت فيه على القرارين يمكن تقول الكلام بتاع ما هي مصر قصدها خير اهو يا جماعة مالكم في ايه؟؟ الحقيقة ان مصر من فترة عندها ازمة كبيرة في الملف السوري مخلياها كل حاجة وعكسها .. النظام المصري باني تحالفاته على اساس قائم على استئصال وجود الأسلاميين السنة جميعا المعتدل فيهم والمتطرف على اعتبار ان كلهم كتلة مصمتة يجب استهدافها عسكريا وسياسيا وامنيا (بغض النظر عن مدى اخلاقية او واقعية او برجماتية هذه المقاربة بس هي المقاربة اللي بيتبناها النظام المصري) بمعنى ان اي طرف بيقاتل او بيستهدف او بيصفي مشروع الإسلام السياسي بنسخته السنية المعتدلة او المتطرفة انا معاه سواء كان الحد ده ايران , او ميليشيا الحشد الشعبي في العراق, او حفتر الليبي, او روسيا او حتى دونالد ترامب.. بأستثناء وحيد وهو التحالف الوهابي المصري اللي قائم في الأساس ان المصالح بتتصالح.. مصلحة الوهابيين في التخلص من العفريت الأخوان اللي بيشوفوا انه بيمثل لهم هاجس ينازعهم الشرعية المبنية على اسس دينية بردو ومصلحة عبد الفتاح السيسي في الرز والجاز السعودي... ده خلق المعضلة الأساسية وهي اللي قايمة على فكرة لو علينا نبعت كمان طيارات تضرب في سوريا مع بشار الأسد بس لولا الخوف من الغضب السعودي الحليف اللي باني تحالفاته على مقاربة تانية خالص وهي الخناقة على الزعامة الأقليمية والدينية مع ايران اللي خلقت الصراع الطائفي السني الشيعي واللي السعوديين فيه بيخسروا مش بيكسبوا... موقف مصر في الأخر لازم يتربط بالتقارب مع روسيا اللي وصل لمفاوضات لتسليم قاعدة سيدي براني في مطروح للروس ومفاوضات قد تكون ناجحة في تواجد للقوات الخاصة الروسية في سينا وهو ما اسميه تحالف الأتوقراطيات العابر للقارات.. مصر اختارت انها تقرب من روسيا لأن مصر بتأسس لأتوقراطية عسكرية تتقاطع وتتصالح مع الأتوقراطية الروسية بس عايزة بردو الرز الخليجي وهو موقف بيوقعها في تناقضات شبه دي.. التصويت بالموافقة على القرار الروسي اللي عايز ينتج هدنه ارض لا هدنة جو في سوريا هو جزء من تشبيكة كبيرة بيعملها النظام المصري اللي بدأ يبنى شبكة حلفاء جديدة تقطع مع تحالفات السادات ومبارك .. وهو للأسف تحالف خسران
تعليقات
إرسال تعليق