ارحنا بها يا سلاوي.. دور الأجانب في المجتمعات الغربية والخواجة النمساوي

من كام اسبوع كده انتشر فيديو للرئيس الفرنساوي ماكرون داخل أحد مراكز الأبحاث لمحاولة إيجاد مصل لفيروس كورونا والباحثين قدموا نفسهم وتقريبا كانت المفاجأة أن كتير منهم يحملوا اسماء عربية او إفريقية. من كام يوم اضطر رئيس عنصري زي ترامب عايز يستهدف الناس على أسمائها وأشكالها وبيشجع ضمنا نظريات تفوق العرق الابيض، اضطر انه يقدم واحد اسمه مصطفى السلاوي المغربي الأصل  اللي بقى مشرف على فريق بحثي لإنتاج لقاح ضد فيروس كورونا،  ولسان حاله بيقول ارحنا بها يا سلاوي. صدق اللي قالKarma is a bitch والزمن غدار يا ابو ايفانكا. بريطانيا لما اتزنقت اليومين اللي فاتوا مالاقوش غير الاطقم الطبية اللي من أصول أجنبية وكتير منهم ماتوا في مكافحة الفيروس ولو دورت في اسماء ضحايا الاطقم الطبية هناك هتلاقي اسماء عربية وهندية وبنجالية ولاتينية. ده فكرني بموقفين في حياتي حصلوا لي الاول لزميلة تشيكية يمينية ومتدينة كانت بتدافع عن سياسات بلادها المعادية للأجانب واللاجئين قالت لي انت عايزنا نجيب اجانب علشان نبقى زي فرنسا وألمانيا وبريطانيا ؟ ( حاجة كده زي عايزنا نبقى زي سوريا والعراق، بس بالتشيكي)،احنا كده قاعدين كويسين. طبعا فرنسا وألمانيا وبريطانيا  عندهم مشاكل لكن مشاكل الدول الكبيرة، اللي في side effects لكل حاجة بيعملوها لكن وقت الجد أغلب اللي تصدى كانوا اللي من أصول أجنبية دول، الحكاية لها اتجاهين، والدول الكبيرة بقيت دول كبيرة علشان عرفت تبقى نقط جذب لناس تانية تجدد دمها وتطور إمكانياتها، مش زي ما الزميلة التشيكية اليمينية فاكرة انهم وحشين ومصدر مشاكل وبس. الموقف التاني صاحب بيت نمساوي كنت ساكن عنده لفترة، كان كل لما يشوفنا يكلمنا عن الاجانب اللي هيفقروا النمسا وهيضيعوا البلد وانه بيدفع ضرايب علشان الحكومة تصرفها على الاجانب اللي هيضيعوا البلد من وجهة نظره، آخر ما فاض بينا سألناه انت بتشتغل ايه اصلا علشان تدفع ضرايب للأجانب الوحشين دول؟ قال انه عنده شقتين مأجرهم للأجانب وبيعيش منهم.. صلاة النبي احسن يا عم النمساوي