احنا قدام انتخابات تاريخية كمان ساعات, تاريخية بمعنى الكلمة. وبغض النظر عن اي مصالح محدودة ممكن تحصل للنظام المصري لو اعيد انتخاب ترامب, فالحقيقة الأضرار اللي ممكن تحصل للعالم وللبشرية كلها كبيرة جدا لو تم اعادة انتخابه ولو اجملنا شوية مشاكل في كام نقطة ممكن نطلع بالأتي:
1- ترامب من خارج المؤسسة اللي اسست الديمقراطية الأمريكية وده بيخليه ما عندهوش ادنى مانع انه يهدم المؤسسة دي ويعلن انه مش هيسلم السلطة وان الأنتخابات هتتزور وكل الكلام اللي بيضرب في عصب الديمقراطية المكشوف ده. ضرب الديمقراطيات الليبرالية بالشكل ده هيشجع كل الحركات الارتدادية ضد الديمقراطية وهيستبدلها مش بالمجتمع المثالي اللي في دماغ الحلويين اليوتوبين, هيستبدلها بنظم شبه اردوجان وبوتين والسيسي و اوربان, وبقية الناس اللي مسففة الكوكب تراب دي.
2- السياسة الإنعزالية لأمريكا من العالم مش خير ابدا لأنها خليت روسيا والصين يبرطعوا زي ما هما عايزين واصبحنا امام تحالف استبدادي عابر للحدود مخلي العالم مكان اكتر خطر.
3- ترامب عنده خطاب بيشجع العنصرية البيضاء اللي بدأـ تتشجع وتتسلح وتقتل كمان فبقينا امام معادلة خطر جدا فيها مجموعة من الحمقى المسلحين المسنودين على خطاب اكبر رئيس في العالم. اعادة انتخابه هيخلينا كلنا معرضين لخطر ال White supremacists اللي ممكن يولعوا في العالم حرفيا واخر واحد كان مؤمن بالحكاية دي كان هتلر ولكم ان تتخيلوا لو ده اتكرر تاني.
4- في ضغوط على النظم الديكتاتورية كانت بتخليهم يتصرفوا بعقلانية شوية حتى في القمع والبطش , الضغوط دي لو رجعت ممكن تكون فرصة للتخفيف على ناس بيتعرضوا لظلم كبير في السجون والمعتقلات. حتى لو عدد قليل فخروج مظلوم واحد من السجون هو في حد ذاته مكسب.
5- الكلام عن تفكيك حلف الأطلنطي والأنسحاب من معاهدة المناخ ومنظمة الصحة العالمية بيضعف فكرة المؤسسات والقواعد اللي بتحكم النظام الدولي, و guess what المنظمات والقواعد دي رغم كل مشاكلها خليت العالم اكتر استقرار واكثر انضباط بالمقارنة بأيام قبل ظهروهم. ودي احصائيات رقمية مش رأي. فكرة اننا نرجع العالم تاني لمكان خالي من فكرة القواعد حتى المتخيلة والمؤسسات حتى الضعيفة هي فكرة مخيفة. اوروبا لولا قبل ظهور حلف الأطلنطي مثلا كانت كل يومين في حرب شكل.
القصد, احمد مش زي الحاج احمد وفي دايما اخف الضررين حتى لو افترضنا ان كلها اضرار. يارب تبقى انتخابات تضع حد لعالم مجنون حتى لو رجعنا تاني لصيغة العالم الغير مثالي لكن على الأٌقل يبقى غير مثالي وعاقل بدل ما يبقى مكان شرير ومجنون كمان.
تعليقات
إرسال تعليق