احتمالات المواجهة العسكرية حول سد النهضة

شوية اساسيات خلينا نناقشهم مع بعض: 

1- التلويح باستخدام القوة غير استخدام القوة, التلويح بيرسل رسايل للأطراف الدولية وبيضغط على الخصم وده في حد ذاته تكتيك مهم لما تتعقد الأمور. ده رد ع الناس اللي بتقول ان التهديد ده طق حنك. كما لو كان ان لازم اول ما نقول يلا نضرب نضرب فعلا. ياريت يبقى طق حنك واثيوبيا تستجيب. احنا مش غاويين حرب يعني. فأنتم كده ما جيبتوش التايهة. 

2- اللي حصل ده ما اسمهوش ردع في لغة الأمن الدولي, اللي حصل اسمه coercion او محاولة اجبار الخصم للأستجابة. الردع فعل سلبي بيمنع الخصم من الهجوم عليك لأن تكلفته عالية, ال coercion او الأجبار فعل ايجابي بيدفع الخصم انه يبدأ يستجيب لو عنده شوية عقلانية. 

3- يبدو ان اثيوبيا ليس لديها الدرجة الكافية من العقلانية نظرا للسياسات الشعبوية اللي بتصور مصر انها عدو (استعماري) وبيتم استخدام مصر كصورة الوحش القابع خلف الغابة علشان يوحد الأثنيات اللي مش عايزة تتوحد دي ودي لغة بيتم استخدامها من السبعينات مش بس من التسعينات, وده هيخلي العمل العسكري احتمال كبير. 

4- مصر هنا ادام احتمالين الأول هو احتمال الحرب الشاملة اللي فيها انزالات برية لاحتلال وتخريب مواقع في الأراضي الأثيوبية وعزل القيادة ومحاولة ضرب سلسلة القيادة والسيطرة Chain of command and communication  ودي تكلفة عالية لكن نتيجتها افضل ولازم السودان يوافق , او ان مصر تقوم بضربة جوية وحصار بحري لأضعاف القيادة الأثيوبية واجبار المجتمع الدولي على التدخل ودي تكلفتها اقل بس نتيجتها مش مضمونة لأنها هتسهل فكرة التماسك القومي الأُثيوبي ورا القيادة الشعبوية بتاعته. 

5- رغم وضوح موقف السعودية, الا ان الإمارات عليها ان تعلن موقف لأن السياسات الإماراتية من فترة بتصطدم بمصر ومنها الملف ده. الإمارات تحيدها مطلوب وكذلك اي محاولات للضغط على تركيا مطلوبة علشان تحيد الصومال واريتريا. 

6- مفيش حاجة اسمها المجتمع الدولي هيفرض عليك تستخدم الحل العسكري او لا. الأمريكان من ايام ادارة ترامب وصلوا لنتيجة ان الحل العسكري مبرر (مش مقبول لكن مبرر) وده اتورث لادارة بايدن بعد الجولة الفاشلة الأخيرة في اثيوبيا. الأمريكان وصلوا لقناعة ان الأثيوبيين بيتعنتوا لأسباب غير عقلانية خاصة ان مصر مش ممانعة انشاء السد لكن مختلفة في مدة ملأه وفي استخدامه لأن الأثيوبيين عايزين يستخدموه كمان في الري كوسيلة لأبتزاز مصر ومحاولة الوصول لفكرة بيع مية النيل كمورد طبيعي اثيوبي مش كنهر عابر للحدود وده ضد القانون الدولي. 

7- تماسك الجيوش بيحصل لو انشغلت بعدو خارجي افضل من الحالة اللي فيها الجيش المصري دلوقتي اللي مطلوب منه انه يختبر وظيفته الأساسية ويختبر قدرته على الدفاع عن امن مصر القومي. الجيوش ان لم تنشغل بالخارج تنشغل بالداخل. دي ملاحظة مش هفسرها اكتر. 

8- الوقت ده مش وقت اساطير ان مصر اهملت العمق الأفريقي والكلام ده, لأن مصر لغاية النهاردة متواجدة يمساعدات لدول البحيرات العظمى وحوض النيل لكنها مساعدات محدودة لأن امكانياتنا محدودة في داخل مصر نفسها, فمعلش ده اللي نقدر عليه حاليا فمفيش داعي اننا نردد نغمة الإبتزاز دي لأن مصر بلد فقيرة اصلا واللي هما محتاجينه اكبر من امكانياتنا.