الحق واحد مات.. تعالى نكره بعض شوية

مش مطلوب من الناس كلها تحب الشخص اللي انت بتحبه ولا مطلوب من الناس كلها انها تبص للدنيا زي ما انت بتبص لها , ولا مطلوب من الناس كلها ان يكون ردود فعلها في احساسها بالظلم زي رد فعلك.. في ناس الظلم بيخلق منهم وحوش ادمية وفي ناس الظلم بيخلق منهم طاقة تسامح وفي ناس بتقدر تتكيف وتكمل وفي ناس الحدث بيفرق معاهم ومش بيقدروا يبصوا للدنيا نفس نظرتك الطيبة الودودة.. الناس بعد ما بتمر بحادثة محتاجة اعادة تأهيل نفسي ولهم حق في الضعف واحيانا في التطرف او حتى الجنون.. ارحموا الناس شوية والله يرحم اللي مات وكل واحد يتعامل مع موت اي حد في الدنيا بالطريقة اللي تريحه.. اه انت فاهم صح ده بمناسبة البوست المتخلف اللي عامله واحد متخلف وداير على الفيس بوك عن ان في ناس بتقول كلام مش كويس على خالد صالح الله يرحمه وبيتم استخدامه لصب مزيد من نار الكراهية في مجتمع عنده فائض منها.. ما هو انت لو شوفت اللي الناس شافوه يمكن كنت على الأقل سكت شوية على حماقتهم. قاعدة بسيطة لا تلوم مجموعة من الناس على حماقات المتطرفين فيهم والا محدش فينا هيعرف يعيش مع التاني . الله يرحمك يا خالد ويرحمنا احنا من الناس اللي كل شغلته تشوف مين بيقول ايه على مين علشان نشر مزيد من الكراهية في مجتمع متشبع بها ولسان حالنا بيقول الحق واحد مات تعالى نستغلها فرصة ونكره بعض شوية...