احكمهم بالخوف ذلك افضل

اتذكر اجهزة الدولة ذات الطابع المعسكر والمسيطر عليها من العسكريين سواء كانوا شرطة او جيش وهي بتخوفنا من المشاركة في الفعاليات العالمية او ورش العمل الدولية للإستفادة والتعلم انهم كانوا بيقولوا لنا خلوا بالكم دول بيضحكوا وبيغسلوا دماغكم وبيسيطروا على عقولكم, طبعا اجهزة الأمن بتحاول تزرع في دماغك حالة الرعب بتاعة فيلم ماتريكس علشان يسهل توجيهك والسيطرة عليك وفقا لكتاب قديم كتبه صلاح نصر اسمه "الحرب النفسية: معركة الكلمة والمعتقد"  لسة ماشيين عليه وفي جزء منه ينصحهم ببث الخوف والفزع في العقول لأنه اسهل طريق للسيطرة على الجماهير, مفيش حاجة بتتغير في مصر لأننا ثبتنا الموجة على الستينات وماشيين عليها والحكاية بتتكرر كأننا في فيلم بيعيد نفسه والمشاهدين مجبرين على المتابعة... 
القصد, ان اجهزة الأمن وهي بتقول ده , مكانش بيثيرني ولا يحفزني كل الكذب اللي بيقولوه والهطل والسماجة في الحجة بقدر ما كان بيحفزني فكرة انهم بيفترضوا افتراض مسبق اننا اشخاص قصر غير واعيين وغير مدركين وغير مسموح لنا بالتحليل واكتشاف الغث من الثمين والتمييز بين الصالح والطالح والمفيد والمضر... افتراض مبدأي انك لمجرد انك مدني وهو عسكري او متعسكر فهو يفكر لك ويقرر لك تسمع ايه او ما تسمعش ايه تقرأ ايه او ما تقرأش ايه تشارك ايه وتمتنع عن المشاركة في ايه , تختار ايه وتستبعد ايه... انت قاصر الى الأبد وهو ولي امرك الأبدي من يحدد لك الى الأبد كيف تفكر ولماذا تفكر وفي ماذا تفكر وكيف تتعلم وماذا تتعلم ومتى تتعلم...