مقموص من النظام

في فرق بين القمصة وبين فعل المقاومة , القمصة دي بتحصل مع شخص في بينك وبينه عشم وبيزعل لزعلك فأنت بتعقبه نسبيا بأنك تبدي زعلك منه, فكلام من عينة خليه يشبع بيها وسايبها لك مخضرة و مش هاكلمك ومقاطعك ده ينفع في حالة القمصة ,, فعل المقاومة بقى حالة تانية خالص , هو صراع ارادات وصراع قوى, انت بتقوم بفعلك وانت عارف انه ضد مصلحة خصمك وان خصمك ده مصلحته تتحقق لم انت ما تتحققش مصلحتك, صراع حقيقي مكاسبك خساير لخصمك وخسايرك مكاسب لخصمك. اللي احنا فيه دلوقتي ده صراع مصالح وصراع قوى (حاليا احنا الطرف الأضعف بمراحل فيه وبنحاول نغير الوضع ده) وفي حالة المقاومة انت بتعمل فعل وبتتوقع ان خصمك بيعمل فعل مضاد لأنه مش كتلة ميتة بالعكس ده في حالتنا دي هو الأقوى بمراحل فمش منطقي لما يعمل الفعل المضاد تقوم انت تتصرف بمنطق القمصة وتقول والله ما انا مكمل خليه يشبع بيها !!! حبيبي ما دي النقطة اللي خصمك عايزك توصل ليها. وهو فعلا عايز يشبع بيها بدون اي فعل مقاومة..
الإحتفاء بالحالة اللي فيها النظام محتاس مش لاقي مرشحين دي حاجة لطيفة لكن ده مجرد ديكور مش اصل الصراع ولا هيأثر فيه بصاغ... النظام هيعيد انتاج نفسه في الحالة الديكورية دي وهيكسب نقاط تانية في حين احنا محتفظين بحالة الجري في المحل اللي لا تتعدى فكرة اننا نسجل مواقف ونضحك على النظام المحتاس في انه يلاقي كحول ينزل ادام السيسي ونقوله احنا مقموصين ومش هنعمل حاجة اشبع بيها