ازمة الردع المصري.

نتكلم في اللي نفهم فيه شوية.. 

القوة مفهوم له طابع مادي طبعا لكن له شق معنوي وهو القدرة على اقناع خصمك ان عندك ادوات تخليك قادر على الحاق ضرر كبير به لا يستطيع تحمله. لو اقتنع خصمك بالحكاية دي فده بيتسمى الردع deterrence فمش بيتجرأ اصلا على تهديد مصالحك المباشرة ودي سياسة تكليفتها اقل نسبيا لأنها مش بتخليك مضطر تدخل في حروب مباشرة مع خصومك لأن وجود القوة نفسها بيقنع خصومك ان خناقتهم معاك خسرانة فبيوفر على نفسه وعليك دخول معارك. لكنها سياسة محتاجة بناء قدرات كبيرة بتتعمل على فترة طويلة. لو فشلت السياسة دي بسبب انك مكنتش حاسم كفاية فده خلل استراتيجي كبير عندك بيستوجب انك تنقل على سياسة تانية وهي سياسة القسر او الإكراه coercion  ودي تكليفتها اعلى نسبيا من الردع لأن في الردع انت مش بتعمل فعل مباشر ضد خصمك, لكن في سياسة الإكراه لازم تعمل فعل مباشر او تهدد بفعل مباشر في حالة لم يستجيب خصمك لمطالبك ويكون عندك القدرة على القيام بالفعل ده فعلا مش مجرد تهديد فارغ وخلاص. لو مصالحك تم تهديدها وما عرفتش تعمل ده ولا ده فاقعد على جنب بقى واقبل ان اي حد يستهدفك ولا تدعي انك دولة كبيرة او حتى دولة يتخاف منها. 

لو مصر ماعندهاش خطط عسكرية جاهزة بيتم تجهيزها بشكل مسبق تضع سيناريوهات مسبقة تبدأ بماذا لو بمعنى ماذا لو هددت اثيوبيا منابع النيل؟ ماذا لو هددت تركيا حقول الغاز؟ ماذا لو هددت ميليشيا اسلاموية الحدود الغربية؟ ماذا لو هاجمت اسرائيل سينا؟ وهكذا,  ووضع الخطط للرد على كل سيناريو من دول, لو ده مش موجود يبقى مصر لا يوجد لديها سياسات امن قومي, في اجتهادات شخصية ومجرد كلام كبير عن حروب الجيل الرابع والخامس والسادس وخناقات مع المعارضة الداخلية وخلاص. 

مفيش حاجة اسمها مش هنقدر نضرب السد علشان الشركات الأجنبية اللي شغالة فيه, لو انت ما اقنعتش الشركات الأجنبية ان السد منطقة ساخنة ينسحبوا منها يبقى انت مش قادر تفرض ارادتك, انت بتكلم حلفائك وتقولهم يسحبوا شركاتهم من هناك زي ما بتنسق اسرائيل وروسيا في سوريا, وزي ما ببتنسق تركيا وروسيا بردو.. لو ما اقتعوش افرض ارادتك لأنها منطقة نفوذك وليس منطقة نفوذهم وساعتها العالم هيعمل لك حساب زي ما عمل لتركيا في سوريا رغم كل التحذيرات اللي اتقالت لتركيا بعدم الدخول. 

كون ان السد نفسه مش في مرمى نيرانك فده خلل فادح يتحاسب المسؤل عنه. ازاي سيبت الصومال لتركيا, وسيبت جيبوتي للإمارات من غير ما تحاول تعمل قواعد او حتى مناورات مشتركة. ازاي لغاية النهاردة ما عملتش مناورات مشتركة مع اريتريا مستغل حالة العداء بينها وبين اثيوبيا؟.. وليه الكلمة السهلة دلوقتي مش هينفع نضرب السد؟ ليه مش هينفع؟ ولو مش هينفع عملت ايه علشان تخليه ينفع؟ طيب مش هتضرب السد نفسه, هل عندك خطط تانية لضرب اهداف تانية في اثيوبيا تخلي تمن استمراراها في سياسة العناد دي تكلفته عالية؟ بلاش يا سيدي تلجأ للقوة مباشرة لكن لازم يبقوا عارفين ان احتمال اللجؤ للقوة وارد وعلى الترابيزة على طول لأن ده اللي هيخليه يتردد انه يتحداك لكن سحب الإحتمال تماما وترديد عمال على بطال مش هنلجأ لأي حل عسكري ده كلام لا يجعل منك دولة قوية قادرة على حماية مصالحها. معلش يعني اللي مش هيقدر يستخدم القوة لحماية مصالحه الحيوية, امال هيستخدمها امتى؟ والجيوش اللي بنستحمل كل افعالها علشان تدافع عننا وعن مصالحنا لو ما اتحركتش علشان حماية مصالح مصر هتتحرك امتى؟, وايه مفهوم ان الجيوش دي عبارة عن نيش السفرة شكله حلو وبيلمع لكن لا يمكن استخدامه لحماية الأمن من تحديات خارجية؟ لو الجيش بس له مهام امنية لقتال المجموعات الإرهابية المسلحة فقط لا غير ما يتحول لقوة شرطة كبيرة بقى وخلاص وبلاها كل ده؟. على مصر ان تراجع سياسات رادعها لأنها فعلا تتعرض لإختبار حقيقي ونرجو الا تطول فترة الصمت لأن الصمت ليس دائما لغة العظماء.