حول تقسيم الحدود البحرية وفكرة اننا لو قسمنا مع تركيا هناخد مساحات اكبر من لو قسمنا مع اليونان
ببساطة في حاجة اسمها الجرف القاري اي ارض قاع البحر اللي بيبقى تابعة لدولة ما وتقدر تسغلها اقتصاديا لو طلع فيها معادن او غاز او مصباح علاء الدين حتى. الجرف القاري ده بيتحدد ازاي؟ ازاي نحدد فين حدود مصر او فين الجرف القاري بتاع مصر وفين الجرف القاري بتاع اليونان مثلا. قالك هات اخر نقطة يابس للبلدين دول وبعد خصم المياه الأقليمية او البحر الأقليمي اللي هي 12 ميل وكمان 188 ميل علشان يوصل الإجمالي 200 ميل شاملة البحر الأقليمي اللي هما ال 12 ميل والمياه الإقتصادية للدولة, طيب لو المسافة اقل من 400 ميل بين دولتين بيقولك قيس المسافة واقسمها. يعني لو المسافة مثلا بين اخر نقطة يابس في اليونان, واخر نقطة يابس في مصر 100 كيلو يبقى مصر لها 50 كيلو واليونان لها 50. فين المشكلة مع تركيا واليونان؟ نقطة اليابس دي هي نقطة اخر جزيرة تابعة لليونان في البحر مش نقطة السواحل اليونانية الأساسية, واخر جزيرة تابعة لليونان بعيدا عن شواطئها على مسافة بعيدة فده بيخلي النقطة اللي بتطالب بيها اليونان وفقا للقانون ده اكتر بكتير من النقط اللي بتطالب بيها تركيا لأن تركيا مالهاش جزر في البحر ومحصورة فقط في نقطة اليابسة اللي على ارضها الأساسية. وعلشان نلخص, الخط اللي بنقيس منه هو خط الجزر مش خط الشاطىء الأساسي, فلو تركيا اخدت الجزر دي من اليونان ساعتها بقى نبقى نروح نقسم مع تركيا اللي بردو هيبقى مساحتنا معاها نفس المساحة لأن تركيا بردو هتحسب الجرف القاري بتاعها وقتها من الجزر بردو.
هل مصر محتاجة فعلا انها تتفق مع تركيا من باب المصالح المباشرة؟
يمكن الإتفاق مع تركيا في مساحة اكبر لكن في مشاكل اكبر.
مصر محتاجة انها تضغط على تركيا فعلا ودي مش مكايدة للكيد, لا ده دفع الخصم الى مناطق بعيدة عن دايرة نفوذك قدر المستطاع. كلمة مكايدة دي بتقول ان مصر بتعمل كده غلاسة وخلاص وده اظنه تبسيط مخل للموضوع لأن في تنافس حقيقي يصل لحد الخصومة. مصر حدودها البحرية فعلا مع جزر اليونان مش مع الساحل الرئيس لليونان ولا مع الساحل الرئيسي لتركيا. مصر مش من مصلحتها اختراع قواعد جديدة تلغي فكرة التقسيم من اخر نقطة يابس؟ ليه تعمل كده؟ علشان خاطر مين تلغي اعترافها باتفاقية 1982؟ علشان خاطر تركيا؟ تركيا بنمثل خصم لنظام مصر الحالي كما انها خصم لكل دول جوارها تقريبا وده غباء منقطع النظير مصر ما ينفعش توقف على مسافة متساوية بين الأتحاد الأوربي, اللي ورا اليونان, وبين تركيا لأنها فعلا كده تطلع خسرانة, خسرانة تحييد خصم وخلق مشاكل لنظام حكم معادي و خسرانة تحالفات مع الأتحاد الأوربي اللي هو افضل ليها من التحالف مع تركيا. اليونان وتركيا يحلوا مشاكلهم مع بعض. لكن مصر لها مصلحة مباشرة في التعاون مع الإتحاد الأوربي بشركات وتكنولوجيا الطاقة بتاعته اللي لو انسحبوا تركيا مش هتنفعها بحاجة في التكنولوجيا دي, وبمحاولة انها تفتح اسواق للغاز المسال اللي عايزة تصدره واللي تركيا مش حابة الموضوع ده لأنه هينافس خط الأناضول اللي جاي من اذربيجان او خط تورك ستريم اللي جاي من روسيا لأوربا.
ببساطة كده, مصر اما تعادي العالم علشان تكسب تركيا او تعادي تركيا وتكسب العالم
تعليقات
إرسال تعليق