الحساب على الضمائر

 ينتشر في الفيس بوك اليومين دول بوستات وصور ان مش كل واحد بدقن او كل واحدة منتقبة اخوان .. علشان الناس لا تصنف الناس اللي بدقن او نقاب بطريقة مش كويسة او تمارس ضدهم عنف ..البوست او الصور دي في ظاهرها الرحمة و في باطنها كراهية بغيضة حيث تحمل تصنيف ضمني وهي ان الناس اللي بدقن او بنقاب ومش اخوان كويسين اتكلم معاهم وعاملهم كويس اما لو عرفت انه اخوان فاعمل معاه اللي انت عايزه .. التصنيف ده في حد ذاته فاشية بردوا لأنك بتهدر حقوق مجموعة من البشر (وهما كتير فعلا) لا جريمة مادية لهم بل تحاسبهم حساب جماعي عن تصنيفات سياسية واختيارات عقائدية.. بداية تصنيف الناس على اساس ايدلوجي ان هذا طيب وهذا شرس وهذا قبيح هي بداية غير مبشرة لو كنا فعلا نبني لجمهورية الحريات والحقوق لا جمهورية الخوف.
مختصر الكلام  لا يوجد تهمة اسمها ان فلان اخواني التهمة ان فلان قتل , سرق , زور, مارس عنف, او حرض على عنف.... الخ ولو بقى فيه تهمة اسمها كده يبقى دي فاشية من نوع اخر... الناس تحاسب على افعالها لا على قناعاتها وضمائرها.