اليوم الأول 8 ابريل : اعشق المطارات لحظات اللقا والوداع
- طيري يا طيارة طيري
-حاجز تذكرة مباشر القاهرة - كوالالمبور والتذكرة مكتوب فيها مباشر بس مصر للطيران حبت تعملها لي مفاجأة ووقفتنا رغما عنا في تايلاند.. وانا اللي كنت فاكر انهم وقفوا غلط.
اليوم التاني 9 ابريل :
- في
تايلاند اول حاجة تدهشك اسم المطار . نزلونا في مطار اسمه سوفارنابهومي ..
اسم مطار ده ولا تعويذة سحرية..الحمد لله اني خرجت منه بدون ان يصيبني
السحر الأسود
- مضيفات مصر للطيران كتير منهم تجاوز السن مش ممكن يا جماعة انتم كده
بتعكسوا ان البلد عجزت .. تروح تايلاند تلاقي الطاقم كله تحت 30 تشوف
المصريين والمصريات تلاقي كتير منهم تحت ال 70
- تستقبلك كوالالمبور من الجو بطبقات كثيفة من الضباب تجعلك لا ترى المدينة وتجعل عملية الهبوط مغامرة، كثافة الضباب تشعرك أن درجة الحرارة تحت الصفر، تخرج من الطيارة تلاقي الدنيا بتمطر والجو حر والناس لابسة نص كم، كم أنتي مبدعة يا كوالالمبور.
- ركبت العربية جنب السواق ، السواق قاعد يمين وأنا قاعد شمال ، أنا أتلخبطت
حسيت اني أنا اللي بأوصل السواق، بيسالني انت منين قلت له مصر بيقولي ما
أعرفهاش. تصدق قفلتني منك ومن بلدك.
- كمية المطر اللي شوفتها في ال 45 دقيقة من المطار للفندق إد المطر اللي نزل على إسكندرية في السنتين اللي فاتوا. بعد كل ده الشوارع نضيفة ومش غرقانة في شبر مية. أظن الرسالة وصلت
- كوالالمبور مدينة حديثة ومنظمة اجمل ما فيها انها لم تصبها لعنه ثقافة الميكروباصات التي دمرت المدن المصرية.. حتى التاكسي له محطة تنتظره فيها
- اليوم الثالث 10 ابريل:
- هنود على صينين على ملايو الناس الخلافات العرقية اللي ما بينهم باينة على الملامح والوشوش لكن تلاقيهم ماشين مع بعض وشغالين مع بعض واحيان كتير راكبين موتوسكيل واحد مع بعض.. اخر صراع عرقي حصل في ماليزيا كان سنة 1969 وكان صراع دموي بس علشان هما ناس بيتعلموا من تاريخهم كويس عرفوا ان اللي بيجمعهم اكبر وان المشاركة في قطعة من الكحكة تكبر بمرور الزمن افضل من الأستئثار بكحكة بيقل حجمها بمرور الوقت.. انها المصالح المشتركة والرغبة في العيش يا سادة
- وبخلاف السواق الهندي اللي قابلته امبارح ومش عارف مصر ركبت النهاردة مع سواق من المالاي عارف مصر كويس ومتابع اخبارنا كمان.. بيقولي ايه اخبار مصر لسه الحرب شغالة فيها .. حرب!!!! هي وصلت للحرب كمان .. الأخبار على ما بتوصل ماليزيا بتكون كبرت اوي
-وكتير من البنات المالاي بيلبسوا حجاب مع تيشرت نص كم , الحجاب بيظهر في احيان كتيرة رمز للتمايز الثقافي والتنوع اكتر منه رمز ديني
- السواق بتاع النهاردة بيقول ان مهاتير محمد لسة (رقم واحد) هنا, الناس بتحب الراجل بجد ومش كلام اعلام يعني ممكن توصل للسلطة وتبقى سبب في ان ربنا يحبب فيك خلقه وممكن ان تصل للسلطة فتبقى سبب في ان الناس تلعن سلسفيل جدودك .. اعدلوا يرحمكم الله
- ما ادركته ان الناس محتاجة تشوف فرق في حياتها وهتوقف معاك ضد العفريت الأزرق .. مهاتير عمل فرق في حياة الناس العادية #خواطر كوالالمبورية
- ست بسيطة جدا لابسة حجاب فوق راسها ويونيفرم بسيط في الأوركيد بارك الساعة 4 العصر يعني على اخر يوم الشغل وقبل الأنصراف بساعة بتشتغل في تنسيق النباتات في درجة حرارة 37ورطوبة زي اسكندرية في الصيف ..بتعمل شغلها بحماس واهتمام بالتفاصيل كما لو كانت حديقة ببيتها .. هذا الحماس للعمل حتى لو كان بسيط وهذا الأتقان للتفاصيل الصغيرة هو ما صنع المعجزة الأسيوية بشكل عام قبل ما تقول مهاتير ولا تنكو عبد الرحمن السر هتلاقيه مع الست البسيطة دي.. قارن المشهد ده بمشهد عامل او موظف مصري بعد ساعة واحدة من بدء يوم العمل انتبهوا للتفاصيل الصغيرة#خواطر كوالالمبورية
- حينما تزور حديقة الطيور في كوالالمبور تشعر وان العالم قد اخترع الوان جديدة طيور اشكال والوان لا اعرف اسمها بالعربي وباحاول افتكر اسمها بالماليزي#خواطر كوالالمبورية
- خرجنا من حديقة الطيور بكوالالمبور لاقينا كشك شيك جدا بيبيع كتب سياحية انيقة قررنا نروح نشتري كتابين عن مدينة كوالالمبور وواحد تاني عن ماليزيا كلها شابين واقفين هناك واحد ينتمي للعرقية الصينية في ماليزيا وواحد يتنمي للعرق الهندي ,كالعادة قابلونا بابتسامة ودودة جدا وبحماس تحسه في كلامهم قلنا شكلنا هندفع ضعف التمن علشان الأبتسامة دي ...واحنا بندور على الكتب واحد من الشابين اللي بيبيعوا صورنا .. قلنا ايه العبط ده هما بيصوروا الزباين كمان ايه البلد العجيبة دي.. لاقينا الكتابين قلنا نخاطر ونسأل على السعر في المكان العجيب ده.. اتفاجئنا.. الراجل قالنا الكتب دي مجانا وخدوا كمان عليها هدايا.. طلع المكان كشك دعائي لوزارة السياحة والأتنين دول شغالين في وزارة السياحة وبيعملوا دعايا للسياحة في بلدهم.. هذه الروح والحماس لو عندنا نصه هتفرق معانا كتير#خواطر كوالالمبورية
- بس علشان ما تفتكروش ان كل حاجة حلوة في ماليزيا سواقين التاكسي يجوا على ساعة الذروة تسألهم ممكن نروح وسط البلد (وسط بلد كوالالمبور) يقولك يفتح الله يا باشا الدنيا قافلة حصل معانا كده مع 3 تاكسيات والتاكسي اللي وقف رفض يشغل العداد.. انت من العصافرة قبلي ياد منك له.. #خواطر كوالالمبورية
يتبع
تعليقات
إرسال تعليق