اهم حاجة عملتها يناير انها حطيت ادينا على اصل الداء وعلة المرض, قبل يناير كنا مجموعة من حسني النية (بتعبير مهذب) او شوية هبل (بالتعبير المناسب) فاكرين ان صراعنا مع الراجل الشرير اللي مش بيحب الديمقراطية اللي عايز يورث العزبة للواد جيمي اللي جمع حوله شلة من المنتفعين والطفيلين على الحرامية ...
- وكلنا الطيبين ضد الراجل الشرير وعصابته المكونة حصرا من 40 حرامي وشوية منتفعين بتخدم عليهم وهينتهي الفيلم اول ما ندخل كلنا على الأربعين حرامي ونقولهم game over احنا الشعب ومعانا الجيش , اقبض عليهم يا حضرة الظابط, فينهار الحرامي ويستسلم بقية الحرامية ويفرح الجميع وانزل يابني بالتيترات بتاعة النهاية زي فيلم العار كده "اجري يا ابن ادم جري الوحوش..... "
- الحقيقة اللي كشفتها يناير ان الحكاية اصعب من كده بكتير
الراجل ده كان نقطة توازن اختلت. تعبر عن مصالح دولة يوليو بتركيبتها وما انقلب عليه الجيش الا عقابا لتوسيع الشبكة بشكل لا يرضي الأطراف...
مبارك لم يكن الا رأس جبل التلج
اللي تحت الراس دي بقى الأتي:
- أقلية (اوليجاركية) عسكرية احتكرت الحكم بقوة السلاح واستولت على موارد مصر وأصبحت هي الوحيدة المسؤولة عن توزيعها ده خلق تفاوت كبير بين العسكريين والمدنيين تفاوت في شكل مزايا تفضيلية وترسيخ إحساس التفوق وسيطرة ولا مساواة لصالح العسكريين كما لو كانوا عرق أفضل وأعلى من الناس.. طبعا خلقوا حواليهم طبقة مدنية طفيلية مستفيدة من تكريس الاستبداد واللامساواة تخدم عليهم وتسعى للابقاء على الاستبداد لأطول فترة ممكنة... ترويكا حاكمة مكونة من العسكر والشرطة والقضا و معاهم جهاز بيروقراطي يتم توجيهه وشراء ولائه بمزايا اقل تبقي على ولائه ولا تجعله يتطلع لما فوق ذلك ومفيش مانع من شوية رجال أعمال يدوروا في فكلهم ويشتروا ولاءات لصالحهم ونظام قبلي وعائلي في الدلتا والصعيد يكتسب مزاياه ويحافظ على تراتبية الشرف و التباهي و العصبية من خلال اقترابه من دوائر الحكم والولاء لها
- كمان خلقوا معارضتهم او اختاروا معارضتهم وهي معارضة قايمة على مجموعة افكار ماضوية قائمة على ان هناك وهم قائم اسمه الحكم بالإسلام , اي ان هناك فئة من الناس تظن انها تنطق بأسم الوحي الألهي وان ازمات الدنيا يمكن ان نحلها بوضع مجموعة من القوانين الجامدة التي لا يمكن تعديلها او معارضتها لأنها لا تنطق عن الهوى وانها وحي السماء, وأنها تمثل الدين والإسلام... مشكلة الشكل ده من المعارضة انها تدفع الناس الى صراع الكفر والأيمان وتمنع التفكير والتطور وتحول الصراع السياسي البشري الى صراع ديني بين اهل الحق واهل الباطل وتتجمد حولها الأفكار وتمتنع معها المعارضة الأخرى لأن الحق له وجهة واحدة فقط ما نطقت به السماء وهم من يمثلوا السماء.
- ان الإبقاء على هذه المعارضة كنموذج وحيد للتغيير هو رهان اخر لدولة يوليو العسكرية ... من خلال ثنائية استبدادنا احسن من استبدادهم... وهو ما حاولوا التركيز عليه في سنة حكم الأخوان والأخوان شربوها سواء بقصد او بدون قصد (مش قضيتي)
- السيطرة دي علشان تستمر لازم الحفاظ على بقرة الدولة المقدسة تحت حكم العسكريين وتفوق العسكري على المدني او تفوق السلاح والأمن على السياسة والحوار .. لا سياسة بدون تنافس وتوزيع للقوة والعسكري يريد ان يركز القوة ويقضي على التنافس لكي يحافظ على مزايا تبدأ من احتكار الحكم إلى احتكار الموارد وإعادة توزيعها كما يترأى لهم مما يكرس لهذه السيطرة ويغذيها ..
- اي محاولة للتغيير الديمقراطي هي محاولة في شكل منها انتزاع مزايا السيطرة والقوة والثروة من الطبقة العسكرية الحاكمة بقوة السلاح والتخويف من الفوضى...
- العفن في مصر مؤسسي وهيكلي لن يتغير إلا بتغير خريطة السيطرة
تعليقات
إرسال تعليق