ديكتاتورية الجغرافيا والقوة الناعمة

عتبارات الجغرافيا خليت مصر في المنطقة دي تحديدا , لها مصالح حيوية في المنطقة دي , دي حاجة مختلفة تماما عن الأفكار القومنجية اللي كان بيروج لها عبد الناصر , لأن عبد الناصر استغل الحقيقة دي علشان يدعم مشروع استبدادي سلطوي قمعي, استغل الحقيقة ما اخترعهاش في فرق, بدليل ان اللي سعى لتحقيق منظمة تعاون اقليمي بين العرب كان حزب الإستقلال والدستور اللي هو حزب الوفد قبل ما حد يعرف عبد الناصر اصلا لما وقع ميثاق جامعة الدول في حكومة الوفد سنة 1944.
افهم اننا نكون ضد افكار اخترعها عبد الناصر لكن اللي مش فاهمه اننا نبقى ضد حقيقة جغرافية لا علاقة لها بعبد الناصر. مصر لها مصالح وروابط في الشرق الأوسط ومع البلاد الناطقة بالعربية فيه لأنهم امتداد ثقافي هام سواء عجبنا الكلام ده ولا معجبناش.. ولما بنشير فرحة اهلنا في غزة ولا في اي مكان ناطق بالعربية بنأكد على فكرة القوة الناعمة دي واثرها , ايه بقى لزمة الفتي المفرغ من اي معنى ان دي افكار قومنجية واننا بنحب غزة زي ما بنحب سفير بربطانيا , وزي ما بنحب كندا؟ ده فتي جاهل للأسف ومش فاهم حاجة وهو محض لغو فارغ .. اللي يقدر ياخد مصر ويحطها في اوروبا او كندا يبقى له الحق انه يقول كده وبما انك مش هتقدر فأسمح لي ده اسمه كلام فارغ. ديكتاتورية الجغرافيا هي الديكتاتورية الوحيدة اللي مش هتعرف نخلص منها سواء كنت ليبرالي او يساري او اسلامي او يميني او يساري.