فضفضة عن المناقشات العامة الملوثة

فضفضة ولا لها اي تلاتين لازمة ...الناس اصيبت بلوثة عقلية ونفسية .. كل لما تناقش حد في فكرة يسيب الفكرة ويشتمك وتسمع بقى وصلة من عينة انا مش بأكلمك انت , ثم تتبعها سلسلة شتائم تشكك في نواياك ومنطقك وافكارك ثم تنتهي بوصلة تعالي انا مش بأكلم امثالك.. واحد شيعي من كام يوم كاتب رأي عن عصمة النبي التي تصل الى حد التقديس طبعا العصمة التي ينظر اليها الشيعة انها ميراث في نسل سيدنا علي كرم الله وجهه و رأي عن قاتل  الخليفة الثاني عمر ابن الخطاب  رضي الله عنه اللي هو ابو لؤلؤة اللي كل السنة ينظروا اليه انه قاتل مجرم وكل الشيعة بينظروا اليه انه ولي من اولياء الله الصالحين طبعا كل واحد حر في معتقداته مفيش فيها كلام لكن لما تحط معتقداتك دي في المجال العام تحمل بقى ان الناس هترد عليه وهتفندها وهتخرج من مجال القداسة الى مجال المناقشة العامة طبعا ناقشته في فلسفة القداسة والتوحيد ثم ناقشته في الحدث التاريخي.. الراجل ما ردش لكن  اسرها في نفسه وأول ما شاف تعليقي عنده في حاجة تانية عمل لي بلوك.. بعدها بكام يوم وائل عباس كلنا طبعا عارفين لسانه (العفيف الشريف اللطيف) كاتب حاجة عن  حماقة صواريخ المقاومة دخلت واحدة رديت عليه رد من عينة الشاطرة تغزل برجل حمار .. قام شتمها في شرفها وعفتها فردت عليه وقالت له انا غلطانة اني بأتناقش معاك عملت لردها ده لايك قام عملي بلوك.. اشطة جدا اخر حاجة بقى واحد صديقي كاتب عن النهضة في الخليج وانا رأي انها نهضة مزيفة(فقاعة)  قائمة على الوفرة الإقتصادية وإستيراد البشر والأدوات  لا على الأسس الطبيعية لأي نهضة وهي الحرية والفكر والجدل بين الأفكار والتفكير العلمي والحكم الرشيد واحدة دخلت تظيط في الظيطة اتهمتني بالجهل والعبط واني بأرص كلام مش فاهمه وبعدين لما اقولها ناقشي الفكرة تقولي مش بأتكلم معاك وهو ده اللي عندي.. واحد تاني  من العيال اللي شايفين ان العرب  كعرق عيب وحرام اصلا  كاتب بيقول ان ابن خلدون مش عربي اصلا دخلت اقوله اذا كان ابن خلدون نفسه كاتب عن نفسه و نسبه العربي (الحضرمي) في اخر اسمه دخل حد يقولي هو اللي كاتبه ده قرآن .... هذه البيئة الملوثة للنقاش العام لا تخلق افكار لكن تخلق شتايم وقلة ادب ولا تشجع على التفكير لكن تشجع على الترديد ايثارا للسلامة وتقتل التنوع  اللي هو احد اساسيات التقدم لأن الناس هتخاف تعرض افكار لأنها بدل ما تتبادل اراء بتتبادل شتائم...مناخ عام ملوث ومقرف..