الإختفاء القسري- الإخفاء وراء الشمس - لماذا هي اقسى انواع التنكيل

عن الإختفاء القسري والإجابة عن سؤال هما ليه بيعملوا كده ليه؟
الإختفاء القسري عقوبة اخترعها النازي ضد المشاركين في حركات المقاومة ضده وهي عقوبة مزدوجة للمعتقل نفسه ولأهله ولكن الأهم انها عقوبة تفزيعية للمجتمع كله. 
بمعني ان انت ممكن بتبقى زعلان على ان واحد قريبك او حبيبك في محنة, لكن في النهاية انت عارف هو فين وبتشوفه مع بعض الصعوبات من وقت لأخر.
لكن الإختفاء القسري حاجة تانية خالص انت لو معتقل بينتهي عندك الإحساس بالمكان و بالزمن وبمعنى الحياة اصلا انت مجرد حاجة تفقد قيمتك الإنسانية تماما وتتحول لحاجة مرهون مصيرك وسنوات عمرك بمزاج شخص او مجموعة اشخاص.
ولو من عائلة المعتقل ستقتلك حتما الإحتمالات ,
ياترى عايش يا ترى ميت, 
يا ترى بيتعذب , ياترى بياكل , ياترى مريض, يا ترى بردان,.... الخ 
والإحتمالات بتتزايد في دماغك وتتركك بين الأمل واليأس والرجاء حتى تحاصرك كل الأفكار السوداء في العالم. الأنسان بطبعه عدو المجهول. 
انه التجسيد الحقيقي لفكرة وراء الشمس اللي اخترعها المصريين للتعبير عن ابشع حاجة ممكن تحصل لشخص والغريب فعلا ان المصريين وهم شعب تعرض لكل انواع التنكيل حينما اراد ان يصيغ جملة قصيرة تعبر عن اقسى انواع التنكيل لم يفكر في القتل والذبح والتعذيب بل صاغ هذه العبارة وراء الشمس او ان الدبان الأزرق ما يعرفش لك طريق جرة... 
فهي حالة تفزيع للمجتمع كله ايضا فالكل يخاف ان ينقطع ذكره او يعيش اهله متعذبين بفكرة يا ترى ويا هل ترى... الإختفاء القسري جريمة مرعبة وأداة رعب خارج إطار القانون تلجأ لها اكثر الأنظمة وحشية وجنون ورغبة في القمع والبطش.. والنظام المصري لسة بيجرب فيها على فكرة رغم كل سوابقه دي ... لذا فأن فضحهم وكشفهم وتفنيد اكاذيبهم هو ضرورة المرحلة حتى لا نتحول نحن او من نحب الى مجرد أرقام لا اسم لنا ولا عنوان ولا يعرف لنا الدبان الأزرق طريق جرة...