الفاشية بدون معلم في 4 خطوات

مش محتاج مجهود منك علشان تتحول لشخص فاشي مكتمل الفاشية وطبعا زيك زي اي مريض نفسي وعقلي مش هتعترف بمرضك ويمكن كمان تسمي المرض ده كلمة ضخمة كده حلوة على الودن تسكن بيها ضميرك وتواجه بيها خصومك مثلا تسمي فاشيتك وطنية , قومية خوف على الدولة , احنا في اختيار اما دولة او لا دولة اي حاجة من الكلام الكبير ده اللي بيريح ويبنج ويخليك تكمل وانت مبسوط. اليك الخطوات العملية:

 1-  التنميط والتكتيل  والتعميم , فالفاشي يكتل خصومه أي يضعهم كلهم في كتلة واحدة مصمتة ليسهل تعميم الأحكام عليها ككتلة لا أفراد فيهم المعتدل وفيهم المتطرف(مثال الكفر كله ملة واحدة ، الإسلاميين كلهم طالبان).

 وبعد التكتيل والتعميم يبدأ في مرحلة التانية 
 2-  مرحلة الشيطنة بأن ينظر إلى هذه الكتلة من الخصوم انهم كتلة واحدة من الشر المطلق  كل ما يفعلوه شر حتى وان بدا للناس غير ذلك وكل ما يقوله لهم به مقصد شرير وكل ما يفكروا فيه هو التآمر ضد الأنسانية (مثال اليهود هم سبب خراب ألمانيا، الغرب متآمر علينا وهو سبب كل مشاكلنا) 

ثم تبدأ مرحلة  رقم 3
3- التشييء أي نزع الصفة الإنسانية عنهم وتحويلهم لمجرد رقم أو شيء لا حقوق له بما فيها حق الحياة وطبعا حق الحرية وحق الكلام  (مثال من رواندا شعار اقتلوا الصراصير التوتسي..من مصر مصطلحات الإنقسام المجتمعي مثل خنازير العلمانية خرفان الإخوان وحديقة الحيوانات اللي اتفتحت مؤخرا على إثر الخلاف السياسي) . تشيء الخصم مقدمة للفقرة الأكثر رعبا ودراما في طريقك للوصول للفاشية الكاملة
4- انتهاك الحقوق ...وهي بداية تحولك لفاشي كامل تنكر الحقوق عن الجميع ولا ترى حقوق إلا لمن يردد أفكارك ويعتنق آرائك. يتسلل هذا الفاشي داخلك تدريجيا ويحولك بالوقت الى مسخ بشري تبرر اي جريمة وتدافع عن اي استبداد وترى ان كل من ليس معك هو بالضرورة ضدك. 
كل واحد فينا في بوادر انه يبقى فاشي لو ترك لمشاعره البربرية والهمجية الفرصة لأن تنتصر على حسه الإنساني اعرف ناس كتير حواليا كانوا بيقولوا كلام كبير عن حقوق الناس كل الناس وكلام اكبر عن ان السماح بأنتهاك حقوق خصومك سيؤدي بك في النهاية لأن تكون ضحية على قائمة انتهاك الحقوق, لكن الناس دول تحولوا خلاص تركوا الفاشي اللي جواهم يحاصر البني ادم اللي فيهم.. 

 حاصر الفاشي اللي جواك قبل ما يحاصرك هو.