- بداية كده من غير ما تتصدم مفيش في العلوم الاستراتيجية ولا في الجيوبوليتيك حاجة اسمها حروب الجيل الرابع أو الجيل الخامس ..
- مجرد واحد أمريكاني سنة 1989 حب يبرر أسباب فشل الدول الكبيرة ضد حروب العصابات زي مثلا إسرائيل وحزب الله امريكا في فيتنام بريطانيا والجيش الجمهوري. فحب يفقع مصطلح جديد. وكعهد الأمريكان في الفرقعة الراجل لا ربطه بمفاهيم علمية سابقة ولا حتى ربطه بنظريات واقعية. .
- قالوا له تقصد ايه يا عم ستركس بالكلام ده وايه هي حروب الجيل الأول والتاني والتالت. . الراجل قالهم هري سخيف قال الجيل الأول هو الحروب اللي كانت ترص فيها الجيوش في تشكيلات عمودية وصفوف وده كان هو الشكل لغاية معاهدة فيستيفاليا اللي احتكرت فيها الدولة القومية العنف المسلح حصرا. .
- قالك الجيل التاني الحروب النابولينية وهي استخدام صفوف عرضية من التشكيلات المنظمة كقوة نيران عريضة و مركزة
- طيب ايه الجيل الثالث يا عم الخواجة قالك الجيل الثالث ظهر مع الحرب العالمية الأولى اللي كان فيها الألمان بيحاولوا يخترقوا خنادق الفرنساويين والجيش اللي يحاصر مؤخرة الجيش التاني يفرض سيطرته. .
-طيب الجيل الرابع .. قال لما أحد طرفي الحرب يبقى non state actor يعني جماعات مسلحة لا تنتظم هيراركيا في شكل جيش لكنها تستخدم تكتيك حرب العصابات ضد الدولة وتحاول تستنزفها عن طريق تكتيكات سريعة وخاطفة وخفيفة الحركة.. وقال إن دي جماعات بيبقى لها حواضن شعبية وبتحاول تأثر في الرأي العام للدولة اللي بتحاربها. .
- عم الخواجة كان مدفوع بفكرة الخيبة الامريكاني في فيتنام والخيبة السوفيتية في أفغانستان والخيبة البريطانية في ايرلندا والخيبة الإسرائيلية في جنوب لبنان.. حب يلاقي سبب أو مبرر للخيبة فطلع بالمفهوم الذاتي اللي علماء الاستراتيجية قطعوه بسببه. ..
- طيب تمام .. الراجل فشل في الآتي أولا تحليله لأجيال الحروب خلط بين تكنولوجيا الحرب من ناحية و تكتيك الخطط العسكرية من ناحية تانية فطول عمر الحروب اللي يحاصر مؤخرة جيش يبقى فرض سيطرته عليه مش محتاجة حرب عالمية ولا حرب الباسوس اصلا وطول عمر الجيوش بتحاول تستخدم قوة نيران عرضية بأكبر قدر من القوى البشرية الممكنة بغض النظر عن شكل رصهم.
القسطنطينية اتفتحت ازاي يعني؟. . مش محتاجة نابليون يا عم الخواجة. .
-وطول عمر الدول بتواجه حركات مسلحة بتستخدم تكتيكات حرب العصابات آمال الحشاشين اللي ظهروا في سوريا في القرون الوسطى دول ايه يعني. . ولا حتى الحركات المعارضة المسلحة في تاريخ الدولة الإسلامية ولا تمرد سبارتكوس بتاع العبيد ضد الدولة الرومانية ده ايه. .
- وطبعا أن الدولة القومية تحتكر هي بس العنف بعد معاهدة فيستيفاليا فدي لوحدها كانت أكبر سخافة والا مكانتش تشكلت أمبراطوريات واختفت أمبراطوريات وقامت ثورات وحركات تحرر. .المهم أن المفهوم وليس النظرية اتقطع تماما لارتباك الخواجة اللي بيقوله. . ايه بقى اللي حصل في مصر بعد الثورة لإحياء هذا الهري الرخيص؟
- فضل المفهوم المضطرب ده في الدرج لغاية ما لوا جيش في الشئون المعنوية أو المخابرات لقى مبتغاه فيه وسربه لعكاشة..
- كلمة تفرقع وغامضة وتسبب حالة من الغموض والارتباك والفزع. . زي ما اقولك احذر سلاح الحنكريش مثلا انه مدمر انه فتاك. . تتخض انت من الكلمة وتخاف لدرجة انك حتى تتوقف عن نقد أو تمحيص الكلام .. كلمة مبهمة وممكن تخوف ومش مهم ايه معناها مناسبة تماما لحملة التشويه اللي بيشنوها على التيار الديمقراطي بدعوى التخوين. .
لكن هامشي معاك بذمتك في أي حاجة من المكتوبة هنا
- بتتكلم عن الهرتلة بتاعة أن المعارضة خيانة وعمالة وطابور خامس؟ حتى في الهري اللي قاله الراجل السخيف ده مفيش الكلام ده. .
- خد عندك مثلا لو كانت المعارضة خيانة لو الدولة بتواجه عمليات مسلحة ضدها من جماعات تنتهج أسلوب حرب العصابات هل منعت بريطانيا المعارضة وتداول السلطة أثناء انشغالها بحربها ضد الجيش الجمهوري الإيرلندي. . هل وقفت اسبانيا حرية التعبير علشان بتتخانق مع ايتا. .. هل توقفت المعارضة ضد الحرب في أمريكا لانها بتحارب في فيتنام هل منعت إيطاليا الانتخابات علشان الالوية الحمرا. هل منعت ألمانيا النقد علشان إرهاب الستينات بتاع الجيش الأحمر او بادر ماينهوف. هل سمعت أن الحزب الاشتراكي الحاكم في فرنسا منع الصحافة تكتب أو قفل برامج تلفزيون أو منع المعارضة من الكلام إلا بحمد الرئيس علشان موجة الإرهاب. .
- كل ما يريدوا أن يفعلوه هو التعلق بمفاهيم بالية لمزيد من القمع ومزيد من مطاردة قيم الديمقراطية لتثبيت الحكم الاستبدادي وابتزاز الناس بالخوف والمزيد من الرعب وهي بيئة مناسبة لتفريخ مزيد من العنف وليس القضاء عليه.
-
-
تعليقات
إرسال تعليق