في حاجة اسمها الإنتخاب العكسي:
يعني ايه انتخاب عكسي ؟
في عملية الإنتخاب الطبيعي في الدول المستقرة ديمقراطيا يتنافس الناس فيما بينهم
لإظهار من الأفضل على تولي المسئولية اللي هي في الغالب بتبقى نيابة عن الشعب وليست تسلط عليه...
وبتتنافس الأفكار والأراء والرؤى والأشخاص في سوق السياسة والناس بتختار
الأفضل لها في فترة زمنية معينة وبعد فترة يمكن ان تراجع افكارها وتراجع الأراء
والرؤى والأشخاص المطروحة في سوق السياسة وتغير على حسب الأفضل والأنسب
للفترة الزمنية المختلفة... فيطلع عندهم مواهب في الحكم وفي الإدارة وحتى في
مجالات غير السياسة زي الفن العلم الموسيقى وغيره وغيره...
مارجريت تاتشر تسلم لتوني بلير (لم يخلفها ولم يكن من حزبها اصلا لكن قدم رؤية
جديدة نقلت بريطانيا لمرحلة ما بعد التاتشرية) هيلموت كول يسلم لأنجيلا ميركل وهكذا .....
الإنتخاب العكسي بقى اللي بيحصل في دول زي اللي شبهنا .. حكامها محدودي
المواهب والخيال فبيختاروا مجموعة تحيط بهم يشبهونهم ويبقوا اقل منهم كمان لا
مواهب لهم الا في ترديد كلام الحاكم والإنتظار لتوجيهات الحاكم ومهاجمة كل من
يتجرأ لإنتقاد الحاكم ..
على الناحية التانية بيبقى في مواهب ومواهب كتير طبعا لأن في الغالب الشخص
الموهوب بيبقى بيعتز برأيه وبيعتز بإستقلاله وإختلافه ولا يمكن ان يقبل ان يتم
تقزميه ليكون مجرد كمبارس في مشهد سخيف لا ابداع فيه ولا رؤية الا رؤية من
على رأي السلطة , كما ان الموهوب في الغالب رأيه من عقله ومن ضميره وليس من
توجيهات سيادته ولا تنظريات معاليه...
كما ان خمول سوق السياسة القائم على تنافس الأفكار يؤدي في النهاية الى تكلس شديد
يمنع الموهوبين من عرض افكارهم لأنها لن تجد ملعب تتنافس فيه ولن تجد جمهور
يدفعها للأمام ولن تجد منافسين يدفعوها للتحسين والمؤامة والتفاوض والتنازل و
التطوير..
فأيه اللي بيحصل؟
في الغالب البلاد دي بتتعرض لأكبر عملية تجريف ممكنة واكبر عملية نزيف عقول ..
اللي يهاجر واللي مواهبه تتآكل بمرور الزمن واللي يسكت واللي يدخل في المنظومة
القاتلة لأي ابداع وأي موهبة واللي ييأيف نفسه علشان يبقى على قد المنظومة ويتقزم زيها ...
عايزين امثلة ؟؟
خد عندك منى البحيري بتاعة سيسي ييس مرسي نو واللي انعم عليها عكاشة بلقب منى
هانم واللي كانت صورة يتم تصديرها كنموذج للمرأة المصرية المثالية.
خد عندك امثلة من مجالات مختلفة
اختفاء باسم يوسف و بلال فضل ويسري فودة و عصام حجي و فاروق الباز والسير مجدي يعقوب وعمرو حمزاوي وعمرو واكد ..... واستبدالهم بعبد العاطي واحمد
موسى وعكاشة والهام واحمد بدير ....... الى اخر القائمة.
كم من اجيال فيك يا مصر وكم من مواهب كانت قادرة على تقديم بدل البديل 100 بديل
وبدل سياسات الفشل سياسات ناجحة تم وأدهم ومنعهم والحجر عليهم لصالح مجموعة
من النصابين اللي كل مواهبهم انهم موهوبين في إعادة انتاج الفشل.
تعليقات
إرسال تعليق