وهم يحسبون انهم يحسنون صنعا

المسألة مش بصدق الخطابات ولا الدموع ولا النحنحة ولا تهدج الصوت. كل مستبد بيبقى مؤمن بقضيته بجد. بيبقى على أيده دم الناس وبردوا حاسس انه مبعوث العناية الإلهية لإنقاذ الأمة وصناعة المجد. اخناتون اللي كان عايز الناس تعبد الهه (اتون) بالعافية وخرب البلد بتطرفه كان مصدق نفسه جدا .نيرون كان مصدق نفسه لحد ما حرق روما. ابو الحكم عمرو ابن هشام (ابو جهل) كان عنده قضية مستعد انه يحارب علشانه ويموت علشانها في ميدان المعركة ,,,البابا كان مصدق نفسه لما كان بيشحن الناس بالكراهية المقدسة علشان يشعل الحروب الصليبية والناس كانت بتموت تحت راية دينينة بصدق وإخلاص للقضية فعلا . الحجاج كان مصدق نفسه لما كان بيضرب الكعبة بالمنجنيق وكان حافظ للقرآن يتهدج صوته اذا آم صلاة. 

هتلر وموسوليني وستالين كانوا مصدقين انهم في مهمة مقدسة لأنقاذ البشرية من الشرور. 

المسألة مش بالدموع ولا صدق المشاعر كلهم مش بيمثلوا, كلهم مصدقين, كلهم مؤمنين بعدالة قضيتهم,  لكن الطريق إلى جهنم مفروش أيضا بالنوايا الحسنة والدموع الساخنة والباطل الذي ظل أصحابه يدافعون عنه على أنه الحق. بمناسبة نحنحة المؤقت عطية مسرور في خطاب وداعه بالأمس اللي شحتفت نص مصر.

 

ربنا لا تجعلنا من الذين ضل سعيهم في الحياة الدنيا وهم يحسبون انهم يحسنون صنعا