احترم حقك في التعبير طالما بتقول نفس الكلام بتاعي

ومن ضمن الأمراض الإجتماعية  المصاحبة لمواقع التواصل الإجتماعي ان اي واحد عايز يزايد ويمنع المناقشة في اي اتجاه يقولك اللي هيقول كذا وكذا هامسحه وهاعمله بلوك  .. ما تمسحه يا حبيبي هي واقفة عليك.. اكبروا بقى اي نقاش في المجال العام بيحتمل الف مدخل والف وجهة نظر.. حضرتك شايف ان الحادثة كذا مالهاش مدلول سياسي حقك.. في غيرك شايف ان لها مدلول سياسي وبيحاول يعرضه مش عاجبك اما تناقشه او تتجاهله.. في ناس شايفين انهم لازم يعالجوا المجتمع بالصدمة مش بالتدريج وفي ناس شايفة العكس .. ده من حقه يقول وده من حقه يقول لكن هتفضل كل لما تحب تزايد وتمنع مناقشة تقولي اي حد مش هيقول اللي انا عايزه يتقال يبقى فيه كل العبر وأنا هامسحه من عندي فأحب اقولك الحقيقة المؤلمة انت لا بتزود ولا تنقص حد الا بفكرة متماسكة بتعرضها.. والأكاونت بتاعك مش الجنة على فكرة ولا حد هيقطع شرايين ايده لما سعادتك تمسحه من عندك... انا فعلا قرفت من جو المناقشة الإرهابي ده

هي نفس النظرية لم تتغير "احترم حقك في التعبير طالما بتقول نفس الكلام بتاعي لو قلت كلام تاني يبقى استحمل بقى يا حلو"
كله من حقه ان يقول اللي عايز يقوله بأي طريقة طالما لم يحرض على عنف او كراهية .. وبخلاف كده اللي عايز يقول حاجة يقولها.